تعلیمی ادارے کھولنے کے حوالے سے کابینہ کمیٹی کی اہم تجویز

تعلیمی ادارے کھولنے کے حوالے سے کابینہ کمیٹی کی اہم تجویز

صوبائی وزیر قانون راجہ بشارت کی زیر صدارت وزیر اعلیٰ ہاؤس میں کابینہ کمیٹی برائےانسداد کورونا کا اجلاس ہوا،

صوبائی وزراء ڈاکٹر یاسمین راشد، میاں اسلم اقبال اور ہاشم جواں بخت نے اجلاس میں شرکت کی،چیف سیکریٹری پنجاب، آئی جی پنجاب ،ایڈیشنل چیف سیکریٹری داخلہ ،سیکریٹری سپیشلائزڈ ہیلتھ، سیکریٹری پرائمری ہیلتھ اور متعلقہ محکموں کے سربراہان نے بھی اجلاس میں شرکت کی،

اجلاس میں بریفنگ دی گئی کہ پنجاب میں کورونا کے نئے متاثرین اور وفات پانے والے افراد کی تعداد کم ہو رہی ہے

پنجاب کے صوبائی وزیر قانون راجہ بشارت کا کہنا تھا کہ صوبہ میں کورونا کیسز میں کمی کے لیے وزیر اعلیٰ عثمان بزدار اور پنجاب حکومت کے اقدامات قابل تحسین ہیں ،کورونا کے خاتمے کے لیے پاک افواج کی معاونت پر تہہ دل سے شکر گذار پیں ،وباء میں کمی کا گراف قائم رکھنے اور مکمل خاتمے تک احتیاط ضروری ہے

راجہ بشارت کا مزید کہنا تھا کہ مویشی منڈیوں میں کورونا ایس او پیز پر سختی سے عملدرآمد کرایا جائے اور گلی محلوں میں قائم غیر قانونی منڈیاں ختم کرائی جائیں ،مویشی منڈیوں میں ایس او پیز پر عملدرآمد کے حوالے سے میڈیا پر موثرآگاہی مہم بھی چلائی جائے، عیدالاضحیٰ کی نماز اور قربانی کے اجتماعات کے لیے محکمہ صحت ایس او پیز تیار کرے

کمیٹی نے ستمبر میں تعلیمی ادارے کھلنے سے پہلے اگست میں اساتذہ کی سمارٹ ٹیسٹنگ کی تجویز سے اتفاق کیا، راجہ بشارت کا کہنا تھا کہ میڈیکل کالجز کے لیے ممکنہ انٹری ٹیسٹ کے لیے بھی محکمہ صحت ایس او پیز تیار کرے ،کورونا کے خلاف نجی ہسپتالوں اور ٹیسٹ لیبارٹریوں نے بھی قابل قدر کردار ادا کیا ہے ،کورونا کے ساتھ ساتھ ڈینگی سے بچاؤ کے لیے بھی حفاظتی اقدامات اختیار کرنے کی ضرورت ہے

کمیٹی نے کورونا سے متاثرہ معیشت اور روزگارکی بحالی کے لیے مختلف امکانات اور پہلوؤں پر غور کیا،تاجروں کو مزید ریلیف دینے کے لیے ہوٹل، شادی ہال اور سیاحتی مراکز کو شرائط اورایس او پیز کے ساتھ کھولنے کی تجویز پر غور وخوض کیا گیا،کمیٹی نے تاجر تنظیموں کے ساتھ ایس او پیز اور شرائط طے کرنے کے لیے مذاکرات شروع کرنے کی تجویز سے اتفاق کیا

اجلاس میں کورونا سے زیادہ وفات پانے والے وی سی نشتر میڈیکل یونیورسٹی ڈاکٹر مصطفیٰ کمال پاشا کے لیے فاتحہ خوانی کی گئی

اپنا تبصرہ بھیجیں