بریکنگ نیوز: وزیراعظم کابینہ اجلاس کے فوری بعد چل بسے

یاموسسو کرو(ویب ڈیسک) وزیراعظم کابینہ اجلاس کے فوری بعد چل بسے۔ افریقی ساحلی ملک آئیوری کوسٹ کے 61 سالہ وزیراعظم عمادو گون کولیبلی کو کابینہ اجلاس میں شرکت کے فوری بعد طبیعت بگڑنے پر اسپتال لے جایا گیا تاہم وہ جانبر نہ ہوسکے۔ وزیراعظم عمادو گون کا 2012 میں دل کا آپریشن ہوا تھا۔

عالمی خبر رساں ادارے کے مطابق آئیوری کوسٹ کے صدر الاسانے اوتارا کی جانب سے جاری بیان میں کہا گیا ہے کہ وزیراعظم عمادو گون کولیبیلی اب ہمارے درمیان نہیں رہے۔ صدارتی محل میں کابینہ اجلاس کے فوری بعد اچانک ان کی طبیعت بگڑنے پر اسپتال لے جایا گیا تاہم وہ جانبر نہ ہوسکے۔ صدر اوتارا نے وزیراعظم عمادون کی اچانک موت پر ملک بھر میں یوم سوگ منانے کا اعلان کیا ہے۔ عمادو گون نے 10 جنوری 2017 کو ملک کے نئے وزیراعظم کا عہدہ سنبھالا تھا اور وہ رواں برس اکتوبر میں ہونے والے صدارتی انتخاب میں حکمراں جماعت کے امیدوار بھی تھے۔ وزیراعظم عمادو گون حال ہی میں فرانس سے لوٹے تھے، وہ دو ماہ تک فرانس میں رہے تھے جہاں ان کا مکمل چیک اپ کیا گیا تھا اور ڈاکٹرز نے انہیں دو ہفتے تک آرام کرنے کی ہدایت کی تھی۔ 2012 میں وزیراعظم عمادو گون کے دل کا آپریشن بھی ہوا تھا۔ صدر الاسانے اوتارا نے ٹویٹر پر وزیراعظم عمادو کے ساتھ 30 سالہ سیاسی رفاقت پر انہیں خراج تحسین پیش کیا۔

اپنا تبصرہ بھیجیں